Naik Turun Tanggo, Wak Dolet Nunggu Bantuan Sembako

oleh

JURNALJAMBI.CO – Wak Dolet nampak gelisah.  Mukonyo masam sepanjang hari. Dak mbuh nian nyo tenang. Tiok sebenta, ado be yang nak ditengok dilua umah. Letih nyo bajalan naik turun tanggo, dibuka pulo jendelo umah tu liba-liba.

Kulup: Uy Wak… apo hal gelisah be ni…. jak tadi ku peratin, Wak ko bentuk nunggu uhang tapi dak tibo-tibo…

Wak Dolet: Uy Lup… Hari apo ko Lup…???? (Wak Dolet lah lupo hari pulo….)

Kulup: Hari Jum’at Wak…

Wak Dolet: Tanggal berapo…???

Kulup: Tanggal 8 Mei 2020 Wak… apo hal ko betanyo hari betanyo tanggal… Ado yang nak cair poh…??? (Tanyo Kulup….)

Wak Dolet: Umah Corona tu dimano Lup…??? (Tanyo Wak Dolet, mukonyo didekatkan ke muko Kulup)

Kulup: Ay.. dah eh… Ngapo pulo nanyo umah Corona… Wak nak betandang yo…??? Pegi lah ke Wuhan Cino sano ha…. biak langsung ketemu dengan keluargonyo…!!! (Kato Kulup ngunyu-ngunyu…)

Wak Dolet: Hehehe… apo pulo nak mengih… begurau be tu… Wak ko jak maren nunggu-nunggu bantuan sembako dari corona, katonyo nak dibagikan hari ko… tapi dak jugo tibo-tibo… Kapan nak dibagikan yo Lup…???

Kulup: Eh… mano ado bantuan sembako dari corona… adonyo Bantuan Langsung Tunai (BLT) dari Dana Desa.  Kalau ado yang ngasih bantuan sembako, berarti itu bantuan pribadi tu wak….

Wak Dolet: Nah… kapan yang BLT tu nak dibagikan? Dusun kanti nampaknyo lah sudah galo….

Kulup: Sabar Wak… iko sayo datang ko lagi nak ngambek data. Sudah tu baru dibagikan…

Wak Dolet: Berapo banyak dapek sembako dari BLT tu Lup..???

Kulup: Jadi gini Wak, BLT ko dak bentuk sembako, tapi bentuk sen sebanyak Rp 600 ribu.

Baca Juga:  Wak Dolet Ganau Nyari Biduk

Wak Dolet: Pake potongan dak..??? 10 persen… 20 persen…????

Kulup: Wai, lah pake persen pulo… dak ado itu Wak… kalau ado potongan macam tu… lapor be langsung Wak.  Dak boleh itu…!!!

Wak Dolet: Oo…. jadi Kapan bantuan tu nak dibagih…???

Kulup: Kan lah sayo kato tadi Wak, Sayo data dulu, kalau data lah lengkap, baru bantuan diserahkan…

Wak Dolet: Ha cepek lah cepek lah… jangan lamo-lamo, kagek lamo pulo BLT ni dibagikan… abih pulo bantuan tu dimakan mencit gek… Pasat-pasat ngambek data tu…. jangan sampai dak tepat sasaran…

Kulup: Asyiiiiaaaaaaapppp…..!!!! (*)