Wak Dolet Ganau, Nyo Dak Tau Siapo Pasien Corona: Katonyo Bukan Aib, Kok Ditutupi…

oleh

JURNALJAMBI.CO – Seharian ko Wak Dolet beganau bukan main. Duduk dak lemak, tiduk dak nyenyak, nak bausik raso-raso dak nyaman. Ruponyo, Wak Dolet ganau kerno dak tau siapo nian uhang nan jadi pasien corona.

Bujang: Ngapo wak, raso dak tenang be idup ko. Jak tadi ku peratin Wak ko dak do nian bamuko cerah.

Wak Dolet: Macam mano nak tenang jang, wabah corona ko makin hari makin menjadi. Lah banyak nan positif corona. Tapi kito dak tau siapo nian uhang nyo.

Bujang: Lah, ngapo nian wak nak tau siapo uhang nan keno corona tu. Mungkin pemerintah sengajo menyembunyikannyo wak, biak keluargo dak resah.

Wak Dolet: Nah ini yang bikin bingung jang, katonyo… Virus corona tu bukan aib, ngapo pulo ditutupi. Bukan kito nak menghino atau membuly keluargo pasien. Tapi, setidaknyo kito tau apo yang harus dilakukan. Pemerintah kan lagi gencar-gencarnyo memutus rantai penyebaran virus corona ko. Kalu kito dak tau siapo yang keno, macam mano kito nak menghindar. Sebaliknyo, kito yang resah jang… biso-biso, keadaan malah makin parah…

Bujang: Iyo jugo wak yo, kagek kito pulo yang tetular. Balek ke rumah, anak bini lah keno pulo. Wai yeh… bidooo neee…..!!!

Wak Dolet: Tu lah jang, pemerintah kito ko agak belebih dikit. Sekelas menteri bae diumumkan, ngapo rakyat disembunyikan…

Bujang:  Ntah lah wak…

Wak Dolet: …????##!!