Wak Dolet Ibo Ati, Hari Rayo Anak-anaknyo Dak Mudik Dipantak Corona

oleh

JURNALJAMBI.CO – Untung dak dapek diraih, malang dak dapek ditolak. Bak cando buah simalakama, rayo tahun ko, Wak Dolet cuma biso pasrah. Bini lah lamo tiado, anak dak pulo balek mudik dipantak corona.

Nak pegi kumah kanti ngilang suntuk, jalan lah diblokir galo. Dusun kanti dak nerimo uhang lain masuk kedusunnyo. Anak cam tu pulo, dak biso balek mudik dek himbauan dari pemerintah untuk memutus mato rantai covid-19. Wak Dolet pun cuma biso tamenung dijendelo umah panggungnyo nan lah tuo.

Bujang: Ndok eh… ibo ngelih Wak Dolet ko Lup. Rayo ko nyo suhang lah dumah. Mbuh lah wak singgah kumahnyo.

Kulup: Payu lah Jang… selamo ko lah banyak jugo duso kito dengan hang tuo tu. Hari baik bulan baek, elok kito singgah sambil barayo.

Keduo pengangguran tulen tu bagegeh kumah Wak Dolet. Tibo dumah Wak Dolet, Bujang dengan Kulup bagantian naik tanggo. Maklum, tanggo umah Wak Dolet ko agak meragukan.

Bujang: Assalamu’alaikum…. (Ucap Bujang dimuko pintu nan tabuka liba. Dari pintu tu, nampak lah Wak Dolet duduk temenung ngadok jendelo umah.

Kulup: Assalamu’alaikum…. (Sambung kulup setengah teriak sambil ngetok pintu. Wak Dolet tekanjat).

Wak Dolet: Wa’alaikum Salaaam…. Oy Jang, Lup… masuk-masuk… ngapo kencang nian ngetok pintu tu, ubuh umah Wak kelak…

Kulup: Eeee… Kami ko lah jak tadi ngimbau Wak, tapi Wak dak kaba. Makonyo kami ketok pintu agak kuek dikik… sehat lah wak…??? (Tanyo kulup memulai pembicaraan. Ketigo uhang tu duduk diateh lapik pandan)

Wak Dolet: Sehat lah Lup… tapi ati be raso taibo. Tahun ko, anak dak do nan balek mudik. Bahu ko nyo nelpon. Katonyo, jalan diblokir. Dak boleh nian kelua dari Kota. Tapakso lah rayo tahun ko surang diri… (Curhat Wak Dolet).

Baca Juga:  Wak Dolet Ganau Nyari Biduk

Bujang: Sabar Wak… namonyo be maso pandemi… kelak, kalau corona ko lah balek ka Wuhan, normal lah balek hiduik kito ko. Balek lah anak-anak wak tu kelak…

Wak Dolet: Iyo Jang… Wak paham… Cuma kini ko kan lain ceritonyo. Hari rayo ko jang… setahun sakali kito merayokannyo. Malah, hari ko lah kito biso kumpul dengan keluargo banyak ko. Hari lain payah… sibuk dengan gawe masing-masing. Cek mano Wak dak ibo ati, Wak ko tinggal suhang lah dumah ko… anak cucu dirantau galo… Rayo ko lah harapan Wak biso kumpul dengan anak, menantu samo cucu… (Aek mato Wak Dolet nitik mengenang nasib dikandung badan).

Kulup: Saba Wak… saba… Semuo pasti ado hikmahnyo… pemerintah ko ngambek keputusan pasti untuk kebaikan kito besamo.

Bujang: Iyo Wak, Kito samo bedo’a be… semoga wabah corona ko cepek berakhir…. (Amiin… sambung Kulup dengan Wak Dolet).

Diateh lapik, adolah minuman kaleng dibagih pejabat dusun lengkap dengan kue kering dalam toples. Wak Dolet mempersilahkan Bujang dengan Kulup mencicipi minuman dan kue nan ado. Senyum Wak Dolet nampak tetahan. Agaknyo, Wak Dolet masih baibo nian dak dapek kumpul dengan anak, menantu samo cucunyo.

Tibo-tibo, Hp tolet-tolet Wak Dolet babunyi nyaring. Saking nyaringnyo, nak nyamoi bunyi toa masjid. Kerno pendengarannyo lah kurang pasat, setiap nerimo telpon, Wak Dolet pasti ngidupkan load speaker. Kali tu, ruponyo anak Wak Dolet nelpon balek.

Wak Dolet: Assalamu’alaikum nak… (Sambut Wak Dolet, kali ko, senyumnyo benar-benar tulus…)

Anak Wak Dolet: Wa’alaikum Salam… Pak… Tadi THR untuk Bapak lah kami transfer tu Pak. Lah masuk ke rekening Bapak… cubo Bapak cek…. (Sebut anak Wak Dolet)

Baca Juga:  Wak Dolet Ganau Nyari Biduk

Wak Dolet: Iyo yo nak… Bapak lum ado nengoknyo. Kagek lah Bapak cek di ATM dekek pasa…

Anak Wak Dolet: Iyo lah pak… Assalamu’alaikum….

Wak Dolet: Wa’alaikum Salaaam… (Baleh Wak Dolet. Kali ni, Wak Dolet bahagia bena lah… senyumnyo lepeh nian, macam kudo lepeh dari kekang. Untung be gigi palsunyo dak lepeh)

Bujang: Alhamdulillah, lah bahagia nian nampaknyo kini Wak, THR lah masuk ke rekening.

Wak Dolet: Iyo Jang… setelah Wak piki-piki, walau baibo ati, ado hikmahnyo anak dak balek mudik, biaya untuk balek mudik biso untuk tambahan THR. Payuh lah jang, kawani Wak ka pasa… cek rekening di ATM. (Begegeh Wak Dolet narik tangan Bujang)

Kulup: Aku cek mano Wak?

Wak Dolet: Kuan tunggu siko be… dak lamo dak..

Kulup: Hang tuo ko yo ntah… Tadi bukan maen beibo ati, kini lah lain pulo… Anak dak balek dak papo, yang penting THR sampai…. Usak.

Wak Dolet: Hehehe… (*)