Jalan Diblokir Gara-gara Corona, Wak Dolet Balek Kanan

oleh

JURNALJAMBI.CO – Siang tu, Bujang agi menung di pos dekat simpang dusun. Nyo mikie kamano nalak lokak ditengah wabah corona. Nak usaho, dak katik modal. Nak kerjo, dak ado pulo lowongan kerjo.

Dak berapo lamo, Wak Dolet nempuh baok honda jet colet kesayangannyo. Motor tu emang lah motor tuo. Tapi mesin, jangan ditanyo. Bersih nian, dak setuo orang yang bawak nyo.

Bujang : Uy wak… Nak kamano..???

Wak Dolet : Suntuk jang, menung be dumah. Nak busik lu ka tempek kanti didusun sebelah.

Bujang : Ado lokak dak wak..???

Wak Dolet : Lokak apo…??? buntu kini ha… (jawab Wak Dolet sambil ngegas motor tuo kesayangannyo tu).

Bujang balek tamenung. Sesekali, dio bagolek dekat kursi nan selarik papan. Nyo mulai menghayal andai kato dio dapek harto karun dan kayo mendadak. Rencanonyo, dio pengen pulo busik ka pantai naik kapal pesiar.

Katiko khayalan mulai tinggi, tadenga bunyi honda nan merepet. Wak Dolet lah tibo pulo. Kali ini, wajahnyo agak masam.

Bujang : Nah… Ngapo cepek nian balek Wak…??? (tanyo Bujang penasaran)

Wak Dolet : Ai dah…. jalan nak ka dusun sebelah tu lah diblokir. Uhang tu dak terimo tamu dari lua. Takut corona.

Bujang : Emang nian lah, jalan dusun sebelah tu lah diblokir. Dusun uhang tu isolasi diri biak dak keno Corona. Yang dak boleh tu, uhan lua yang dak punyo KTP Jambi. Tu ngapo pulo Wak dak biso masuk…?

Wak Dolet : Itu lah jang, Uwak ko dak pulo baok dompet. Ado nian baok dompet, KTP tu dak tik. Lah usak….!!!

Bujang : Hadeeeh…  Macam mano Uwak ko. Masak dak punyo KTP. Mangkonyo, KTP tu diurus, dibuat balek…!!!

Wak Dolet : Ai dah… Mubazir Jang, siso kontrak didunia ko mungkin dak lamo lagi…!!!

Bujang : Ai sudah……!!!! (((Nepuk kening…)))