Wak Dolet Ganau Nyari Biduk

oleh

JURNALJAMBI.CO – Pagi ko, Wak Dolet ili mudik ditepi batang aek. Niatnyo, nak pegi mancing ke lubuk penuh ikan naik biduk. Tapi, biduk yang baru nyo beli seminggu petang lah dak ado ditempat. Padahal, biduk tu nyo tambat dibawah batang buah bedaro. Yang ado, cuma biduk lamo punyo Bujang yang lah tebenam dalam aek.

Dak lamo, Buyung tibo ditepi aek baok pendayung usang kebanggaannyo.

Buyung: Uy Wak… ngapo panik nian. Ado yang ilang yo?

Wak Dolet: Iyo Yung, biduk punyo Wak nan werno biru langit tu dak ado. Padahal, petang biduk tu Wak kebat dibawah batang bedaro tu Yung. Kini dak ado lagi, apo hanyut, apo dicilok kanti.

Buyung: Oh… biduk tu, yang ado gambar kuro-kuro tu yo? Yang Wak beli mahal di Pasar Senen?

Wak Dolet: Iyo Yung… Yang Wak beli minggu petang ko ha…

Buyung: Eeee…. Wak lupo poh? Biduk tu kan dipinjam Bujang. Nyo mancing ka lubuk buntal.

Wak Dolet: Aiiih…. bilo nyo minjam Yung…???

Buyung: Sore maren ko ha Wak… Nyo ngato langsung samo Wak… Haaa…. tu biduk punyo Bujang…

Wak Dolet: Iyo yo…??? Ai.. Wak Lupo Yung… Lah bedegup jantung Wak dibueknyo… mano biduk tu mahal, elok pulo… kalau dipaling kanti yo balak gedang yung….

Buyung: Dak ado dipaling kanti dak… tapi dipinjam Bujang… Rencanonyo kami nak nyusul Bujang jugo pake biduk dio ni… Wak ikut dak?

Wak Dolet: Cek mano yeh…. Elok dak biduk tu?

Buyung: Jadilah wak… penting kanti tibo kito sampai… kito kuras dulu aek nyo Wak…

Wak Dolet: Ai Dah… Cacaaam…. Biduk elok dipake kanti, tepakso lah pakai biduk buruk… jangan pulo pendayung nyo patah….!!!

Buyung: Eh… biduk mungkin buruk, tapi telap lah baok kito beduo pegi mancing dilubuk… pendayung ko jugo pendayung pusako, warisan turun temurun Wak…

Wak Dolet: Lah lah… cepek lah kuras biduk tu… lah gata nak belayar… kito susul Bujang tu…

Buyung: Asyiaaaaaap….!!! Yang penting yakin dan percayo….!!! (*)